Hayman Capital Management-ის ინვესტიციების დირექტორმა კაილ ბასმა თქვა, რომ ბიტკოინი შეიქმნა ჩინეთის დაზვერვის მიერ, რათა შესუსტებულიყო აშშ დოლარის დომინირება მსოფლიო ასპარეზზე.
ბასის ვარაუდით, დეცენტრალიზებული კრიპტოვალუტა – ბიტკოინი – არ იყო შექმნილი იდუმალი სატოში ნაკამოტოს მიერ. ბასმა ამ ფართოდ გავრცელებულ რწმენას შეცდომაში შემყვანი ამბავი უწოდა.
Hayman Capital Management-ის ტოპ მენეჯერი დარწმუნებულია, რომ ბიტკოინის შექმნა ჩინეთის საგარეო პოლიტიკის სტრატეგიის ნაწილი იყო. ბიტკოინი შეიქმნა, როგორც დოლარის ალტერნატივა საერთაშორისო გადახდებისთვის და ანგარიშსწორებისთვის, რაც კარგად ერგება ჩინეთის სტრატეგიას შეერთებული შტატების ეკონომიკური ჰეგემონიის შესუსტების მიზნით, ექსპერტების აზრით. ჩინეთი შეიძლება იყოს ბიტკოინის განვითარების უკან, რათა მშვიდად შეარყიოს გლობალური დამოკიდებულება დოლარზე და შეცვალოს დასავლეთის ტრადიციული ფინანსური სისტემები, მიიჩნევს Hayman Capital-ის საინვესტიციო დირექტორი.
ბიტკოინის შემქმნელის ნამდვილი ვინაობა კვლავ საიდუმლოდ რჩება – 2009 წელს პირველი კრიპტოვალუტის გამოშვების შემდეგ. ამ საკითხთან დაკავშირებით სხვადასხვა თეორიები გაჩნდა. ბიტკოინის ჟურნალის რედაქტორის პიტ რიზოს თქმით, ნაკამოტოს უეცარი გაუჩინარების უკან შესაძლოა აშშ-ის ცენტრალური სადაზვერვო სააგენტო (CIA) იყოს.
2021 წელს ჩინეთის მთავრობამ სრულად აკრძალა კრიპტოვალუტებით ვაჭრობა და მაინინგი. ბიტკოინის დეცენტრალიზებული სტრუქტურა და ცენზურისადმი მდგრადობა მას რეგულატორების, მათ შორის ჩინეთის სახალხო რესპუბლიკის სამიზნედ აქცია. ჩინეთის ხელისუფლებამ არაერთხელ აღნიშნა, რომ ციფრული აქტივები საფრთხეს უქმნის ქვეყნის ფინანსურ სისტემას. აგვისტოში ჩინეთის უმაღლესმა სახალხო სასამართლომ და უმაღლესმა სახალხო პროკურატურამ კრიპტოვალუტებით ტრანზაქციები აღიარეს ფულის გათეთრების ერთ-ერთ მეთოდად, რადგან ვირტუალური აქტივებით ვაჭრობისას შემოსავლის წყარო ხშირად დაფარულია.
